Ég geri ráð fyrir að flestir þeir sem skoða þessa síðu hafi mestan áhuga á því að heyra eitthvað um hann Markús. Nú er hann orðinn 10 mánaða gamall og það styttist óðfluga í eins árs afmælið. Strákurinn getur nú notað borð, sófa, lappir og aðra hluti til þess að standa á fætur. Hann getur fikrað sig hægt og rólega eftir borðkanti, stólum og öðru stöðugu, án nokkurar hjálpar. Samt sem áður finnst honum skemmtilegast þegar annað okkar tekur í hendurnar á honum og leiðir hann fram og til baka eftir gólfinu. Satt að segja finnst honum það svo gaman að hann fer að stórskæla um leið og við stoppum gönguna. Það þarf ekki einu sinni að setja hann niður, bara að stoppa.

Annars er hann líka mjög hrifinn af því að sitja í þartilgerðum bakpoka þegar ég og/eða konan förum í göngutúr.  Hann blaðrar mjög mikið, hvort sem hann er í góðu eða vondu skapi. Því miður getum við lítið skilið hvað hann er að segja, en við getum stundum samt skilið boðskapinn og hann lætur svo sannarlega heyra í sér ef hann er óánægður. Sum orð getum við skilið, eins og mamm, babbababb (pabbi), takk og títthei (þegar hann er að fela sig).

Markús hefur líka gaman að öllu sem aðrir krakkar eru hræddir við, t.d. ókunnugt fólk, gröfur og ryksugan. Þegar verið er að þrífa heima skríður drengurinn á eftir ryksugunni og reynir eftir bestu getu að hjálpa til.

Sjálfur er ég í stöðugri vinnu hér á Fjellhaug við skipulag og eftirlit eftir stúdentaheimilinu. Þetta er strembnari vinna en ég hélt þegar ég tók við henni í janúar, en hún hefur einnig margar góðar hliðar. Í viðbót við þessa vinnu hef ég líka tekið við ritstjórn á fréttablaði skólans. Það er alveg frábær vinna.

Svo er það auðvitað mastersritgerðin. Ég er kominn vel af stað með hana, og fyrir þá sem ekki hafa heyrt það ennþá fjallar hún um "mál beggja kynja". Til þess að koma í veg fyrir misskilning, er ritgerðin ekki ætluð sem gagrýni af biblíu 21. aldar, heldur sem athugun á fyrirbærinu. Þar að auki hefur umræðan um biblíu 21. aldar verið afskaplega lítil í samanburði við t.d. Today's New International Version (TNIV) sem var gefin út á svipuðum tíma.

Margrethe er ennþá í barnsburðarleyfi en byrjar bráðum aftu í skólanum. Í vor á hún að taka prófin sem hún gat augljóslega ekki tekið í fyrra. Í vetur hefur hún tekið þátt í mæðramorgnum í kristniboðssalnum í Osló og Hobbýkvöldum á sama stað. Upp á síðkastið hefur hún líka tekið þátt í skipulagningu á þessum samkomum. Varðandi hið síðastnefnda hefur hún sett upp sérstaka bloggsíðu þar sem hún sýnir eitthvað af sem hún er að gera: glederiheimen.blogspot.com

Til að gera ekki þessa langloku ennþá lengri læt ég þetta duga í bili.